ଅଞ୍ଚଳ କୁ ଉଜ୍ଜ୍ଵଳିତ କରି ନିଜେ ଅନ୍ଧାର ରେ ......
ପ୍ରଜ୍ଜ୍ଵଳିତ ଦୀପ ତଳ ଅନ୍ଧାର ରେ ଦୁଇ ଅମ୍ଳାନ ବ୍ୟକ୍ତିତ୍ଵ , ଉପ ବାଚସ୍ପତି ନାରାୟଣ ବୀରବର ସାମନ୍ତ ଏବଂ ବିଧାୟିକା ରତ୍ନାମାଳୀ ଜେମା
Onm
ପାରାଦୀପ ବନ୍ଦର, ଏହା ଯେ ଏକ ନାମ ତା ନୁହେଁ, ଆଜିର ଦିନରେ ଏହା ହେଉଛି ଏକ ସ୍ଵତନ୍ତ୍ର ପରିଚୟ । କିମ୍ବଦନ୍ତୀ କୁହେ ପରାଶର ମୁନିଙ୍କ ନାମରୁ ଏ ଅଞ୍ଚଳ ର ନାମ ପାରାଦୀପ ରଖାଯାଇଛି କିନ୍ତୁ ପରବର୍ତ୍ତୀ ସମୟରେ ଏଠାରେ ଏକ ବୃହତ୍ ବନ୍ଦର ପ୍ରତିଷ୍ଠା ହେବାରୁ ଏହାର ନାମ ଦେଶ ବିଦେଶରେ ପରିଚିତ ହେଲା । ପାରାଦୀପ ବନ୍ଦର ଯେ ଖାଲି ପରିଚୟ ସୃଷ୍ଟି କରିଛି ତା ନୁହେଁ ପାରାଦୀପ ବନ୍ଦର ପ୍ରତିଷ୍ଠା ପରେ ଏହା ଆମ ଓଡ଼ିଶା ରାଜ୍ୟ ପ୍ରଗତିର ମୁଖଶାଳା ପାଲଟିଥିବା ବେଳେ ରାଜ୍ୟ ତଥା ଦେଶର ଆର୍ଥିକ ମେରୁଦଣ୍ଡ ସୁଦୃଢ଼ କରିବାରେ ମଧ୍ୟ ବେଶ୍ ସହାୟକ ହୋଇ ପାରିଛି । ତେବେ ଏହି ବିକଶିତ ଭବିଷ୍ୟତକୁ କେହି ନା କେହି ଦିନେ ନା ଦିନେ ଏକ ପରିକଳ୍ପନା କରିଥିବେ ଯାହାର ସଫଳ ରୁପାୟନ ଆଜି ପୁର୍ବ ଭାରତରେ ଏକ ସ୍ଵର୍ଣ୍ଣିମ ଅଧ୍ୟାୟ ଲିପିବଦ୍ଧ କରି ପାରିଛି । ତେବେ ପାରାଦୀପ ବନ୍ଦର ନାଁ ଉଠିଲା ବେଳକୁ ସମସ୍ତ ଙ୍କ ଆଖି ଆଗରେ ନାଚି ଉଠେ କଳିଙ୍ଗ ର ବରପୁତ୍ର, ପ୍ରବାଦ ପୁରୁଷ, ମହାନ୍ ଜନନାୟକ ବିଜୁ ପଟ୍ଟନାୟକ ତଥା ବିଜୁବାବୁଙ୍କ ପ୍ରତିଛବି । କିନ୍ତୁ କେହି କେବେ ବି ତା ପ୍ରଚ୍ଛଦପଟ ର କାହାଣୀକୁ ଜାଣିବାକୁ ଚେଷ୍ଟା କରିନାହାଁନ୍ତି। ସେ କାହାଣୀ ଯେ ଦୀପତଳ ଅନ୍ଧାରରେ ମିଳେଇ ଯାଇଛି ତାହା କେହି କେବେ ସ୍ମୃତି ଚାରଣ ମଧ୍ୟ କରି ନାହାଁନ୍ତି । କେବଳ ଏକ ରାଜନୈତିକ ବାତାବରଣ ଓ ଅକୁହା ଅଣଦେଖା ମାନସିକତା ରେ ସବୁକିଛି ମିଳେଇ ଯାଇଛି। କିନ୍ତୁ ଦୀର୍ଘ ବର୍ଷ ପରେ ହେଲେ ବି ଯଦି ଏହା ବିସ୍ତୃତ ଭାବେ ଲୋକ ଲୋଚନକୁ ନ ଆସେ ତାହେଲେ ଇତିହାସ ରଚୁଥିବା ପିଢ଼ି ତଥା ବିତିଯାଉଥିବା ପିଢ଼ି କେବେ ହେଲେ ଅତୀତ କୁ କ୍ଷମା ଦେବନାହିଁ । ଯାହାର ଆଜିର ଦିନରେ ଗର୍ବ ଓ ଗୌରବ ର କୁହାଯାଇପାରିବ ଏବଂ ଗର୍ବର ସହିତ ୨ଟି ନାମ ଉତ୍ତୋଳନ କରାଯାଇ ପାରିବ ତାହା ହେଉଛି ନାରାୟଣ ବୀରବର ସାମନ୍ତ ଏବଂ ରତ୍ନାମାଳୀ ଜେମା ।
ତେବେ ଏ ମହାନ୍ ବ୍ୟକ୍ତି ବିଶେଷତ୍ଵ ଆଜି ସିନା ଦୁନିଆରେ ନାହାଁନ୍ତି କିନ୍ତୁ ଏ ଦୁଇ ଜଣଙ୍କ ଅବଦାନ କିନ୍ତୁ ପାରାଦୀପ ଅଞ୍ଚଳ ପ୍ରତି ଅବିସ୍ମରଣୀୟ। ହେଲେ ଦୁଃଖ ଓ ପରିତାପର ବିଷୟ ଏହି ମହାନ୍ ଜନନାୟକ ଓ ଜନନାୟିକା ଙ୍କୁ ଦୀପତଳ ଅନ୍ଧାରରେ ଲୀନ ହେବାକୁ ପଡ଼ିଛି ।
ପାରାଦୀପ ବନ୍ଦର ପ୍ରତିଷ୍ଠା ଦିଗରେ ସିନା ବିଜୁବାବୁଙ୍କ ଉଦ୍ୟମ ଅତୁଳନୀୟ କିନ୍ତୁ ପ୍ରଚ୍ଛଦପଟ୍ଟ ରେ ନାରାୟଣ ବୀରବର ସାମନ୍ତ ଙ୍କ ଉଦ୍ୟମ ମଧ୍ୟ କିଛି କମ୍ ନୁହେଁ । ସ୍ଵାଧୀନତା ସଂଗ୍ରାମୀ ତଥା ପାରାଦୀପ ଗଡ଼ ପଞ୍ଚାୟତର ବାସିନ୍ଦା ନାରାୟଣ ବୀରବର ସାମନ୍ତ ୧୯୩୨ ମସିହା ରେ ପାରାଦୀପ ବନ୍ଦର ପ୍ରତିଷ୍ଠା ନେଇ ପରିକଳ୍ପନା କରିଥିଲେ । ସେତେ ବେଳେ ଭାରତ ପରାଧିନ ଥିବାରୁ ତାଙ୍କ ପରିକଳ୍ପନା କେବଳ ସ୍ଵପ୍ନ ରେ ରହି ଯାଇଥିଲା । କିନ୍ତୁ ଯେତେ ବେଳେ ଭାରତ ସ୍ୱାଧୀନତା ର ସ୍ଵାଦ ଚାଖି ଥିଲା ସେତେ ବେଳେ ପାରାଦୀପ ବନ୍ଦର କୁ ନେଇ ସାମନ୍ତ ଙ୍କ ଆଶା ଓ ଆକାଂକ୍ଷା ପୁଣି ଜାଗ୍ରତ ହେଲା ଯାହା କେବଳ ସୁଯୋଗ କୁ ହିଁ ଅପେକ୍ଷା କରିଥିଲେ। ତେବେ ସେହି ଶୁଭ ମୁହୂର୍ତ୍ତ ଆସି ପହଞ୍ଚିଥିଲା ୧୯୬୨ ମସିହା ରେ । ଯେଉଁ ସମୟରେ ତାଙ୍କ ର ସହଧର୍ମିଣୀ ରତ୍ନମାଳୀ ଜେମା ବିଧାୟିକା ଏବଂ ଓଡ଼ିଶା ର ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ଥିଲେ । ଏପରି ସୁଯୋଗ କୁ ହାତଛଡ଼ା ନକରି ତୁରନ୍ତ ନିଜର ପ୍ରସ୍ତାବକୁ ବିଜୁବାବୁ ଙ୍କୁ ସମର୍ପି ଥିଲେ ଯେଉଁ ପ୍ରସ୍ତାବରେ ରେ ବିଜୁବାବୁ ମଧ୍ୟ ତତ୍ପରତାର ସହ ସହମତି ପ୍ରଦାନ କରି ତତ୍କାଳିନ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁ ଙ୍କ କରକମଳରେ ପାରାଦୀପ ବନ୍ଦର ର ଶୁଭ ଦେଇଥିଲେ ।
ତେବେ ଦୁଃଖ ଓ ପରିତାପ ର ବିଷୟ ଏହି କି ଯେ ପାରାଦୀପ ବନ୍ଦର ପ୍ରତିଷ୍ଠା ହେବା ପରେ ତତ୍କାଲିନ ସ୍ଥାନୀୟ ବିଧାୟକ ଙ୍କୁ ଯେପରି ସମ୍ମାନ ମିଳିବା କଥା ତାହା ଆଜି ପର୍ଯ୍ୟନ୍ତ କେହି ଦେଇନାହାଁନ୍ତି। ନା ଦେଇଛି ପାରାଦୀପ ବନ୍ଦର ନା ଦେଇଛି ବନ୍ଦର କୁ ଭିତ୍ତି କରି ଗଢି ଉଠିଥିବା କୌଣସି ଶିଳ୍ପ ସଂସ୍ଥା । ସେହିପରି ବିଧାୟିକା ରତ୍ନମାଳୀ ଜେମା ଓ ନାରାୟଣ ବୀରବର ସାମନ୍ତ ଙ୍କୁ କେହି କେବେ ମନେ ମଧ୍ୟ ପକାଇ ନାହାଁନ୍ତି ନା ରାଜ୍ୟ ସରକାର ନା କେନ୍ଦ୍ର ସରକାର । ସବୁକିଛି ରାଜନୈତିକ ଦଳ ଓ ତାର ପଶାପାଲି ରେ ଯେପରି ପେଶି ହୋଇ ରହିଯାଇଛି । କେବଳ ପାରାଦୀପ ବନ୍ଦର କୁ ନେଇ ତତ୍କାଳୀନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ଓ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁ ଙ୍କୁ ସବୁ ସ୍ଥାନରେ ଶ୍ରେୟ ଦିଆଯାଉଛି । କିନ୍ତୁ ସ୍ଥାନୀୟ ନେତୃତ୍ୱ ଓ ପରିକଳ୍ପନା ଧାରୀଙ୍କୁ ସମ୍ପୁର୍ଣ୍ଣ ଅଣଦେଖା କରାଯାଉଛି । ଯାହାକୁ ଜେମା ସାମନ୍ତ ପ୍ରେମୀଙ୍କୁ ବେଶ୍ କଷ୍ଟଦାୟକ ଅନୁଭବ ହେଉଛି ବୋଲି କହିଛନ୍ତି ।
ନାରାୟଣ ବୀରବର ସାମନ୍ତ (୨୧ ଅକ୍ଟୋବର ୧୯୦୦ ମସିହା ରେ ଜନ୍ମଗ୍ରହଣ କରିଥିବା ବେଳେ- ୯ ଅପ୍ରେଲ ୧୯୯୯ ମସିହା ରେ ଦେହତ୍ୟାଗ କରିଥିଲେ ) ନିଜର ରାଜନୈତିକ ଲମ୍ବା କ୍ୟାରିୟର ମଧ୍ୟ ରେ ସେ ଜଣେ ଓଡ଼ିଆ ରାଜନୀତିଜ୍ଞ ଭାବେ ବେଶ୍ ପରିଚିତ ଥିଲେ । ସେ ୧୯୪୬ ଓଡ଼ିଶା ବିଧାନ ସଭା ନିର୍ବାଚନରେ ପୂର୍ବ କଟକ ସଦର ନିର୍ବାଚନ ମଣ୍ଡଳୀରୁ ସ୍ୱାଧୀନତା ପୂର୍ବର ୨ୟ ଓଡ଼ିଶା ବିଧାନ ସଭାକୁ ଜଣେ ବିଧାୟକ ଭାବରେ ନିର୍ବାଚିତ ହୋଇଥିଲେ ଏବଂ ଭାରତ ସ୍ବାଧୀନତା ପାଇବା ପରେ ୧୯୭୧ ମସିହାରେ ହୋଇଥିବା ଓଡ଼ିଶା ବିଧାନ ସଭା ନିର୍ବାଚନରେ ସେ ଏରସମା ବିଧାନ ସଭା ନିର୍ବାଚନ ମଣ୍ଡଳୀରୁ ୫ମ ଓଡ଼ିଶା ବିଧାନ ସଭାକୁ ନିର୍ବାଚିତ ହୋଇଥିଲେ । ଏହା ପରେ ବିଜୁବାବୁ ଙ୍କ ଅନୁରୋଧ କ୍ରମେ ସାମନ୍ତ ଙ୍କୁ ୧୯୭୧ ମସିହା ରେ ଓଡ଼ିଶା ବିଧାନସଭାର ଉପ ବାଚସ୍ପତି ପଦ ମଧ୍ୟ ସମ୍ଭାଳିବାକୁ ପଡ଼ିଥିଲା ।
ତେବେ ନାରାୟଣ ବୀରବର ସାମନ୍ତଙ୍କ ଦୁଇଥର ବିଧାୟକ ପଦ ସହିତ ଉପ ବାଚସ୍ପତି ପଦ ଓ ରତ୍ନମାଳୀ ଜେମା ଙ୍କ ବିଧାୟକ ପଦ ପାଇଁ ପାରାଦୀପ ଗଡ଼ ପଞ୍ଚାୟତ ସମେତ ପାରାଦୀପ ଅଞ୍ଚଳ ବାସୀ ବେଶ୍ ଗର୍ବିତ । କିନ୍ତୁ ରାଜନୈତିକ ଇଚ୍ଛାଶକ୍ତିର ଅନ୍ଧାରରେ ଏହି ବ୍ୟକ୍ତି ଓ ବ୍ୟକ୍ତିତ୍ଵ ଦ୍ବୟ ଯେପରି ହଜି ଯାଇଛନ୍ତି ।
ସ୍ବାମୀ ସ୍ତ୍ରୀଙ୍କ ଆନ୍ତରିକ ବାର୍ତ୍ତାଳାପ, ଦୃଢ଼ ଇଚ୍ଛାଶକ୍ତି ସହିତ ଅନ୍ତର୍ନିହିତ ଶକ୍ତି ଓ ଅବିରତ ଉଦ୍ୟମ ଫଳରେ ତତ୍କାଳୀନ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କୁ ଆଣି ପାରାଦୀପ ବନ୍ଦର ପ୍ରତିଷ୍ଠା ର ସ୍ବପ୍ନ ସାକାର ହୋଇଛି ସତ କିନ୍ତୁ ପରବର୍ତ୍ତୀ ପିଢ଼ି ଏହାର ସ୍ମୃତି ଚାରଣ ତ ଦୁରର କଥା ସଭା ସମିତିରେ ପଦୁଟିଏ କହିବା ପାଇଁ ମଧ୍ୟ କୁଣ୍ଠାବୋଧ କରୁଛନ୍ତି । ଏହା
ଏ ମହାନ୍ ବ୍ୟକ୍ତିତ୍ଵ ପ୍ରତି କୁଠାରାଘାତ ନୁହେଁ କି ?
ଏ ଅଞ୍ଚଳର ବରପୁତ୍ର ଙ୍କ ପ୍ରତି ଅସମ୍ମାନ ନୁହେଁ କି ?
ଏ ଅଞ୍ଚଳ ବାସୀଙ୍କ ମାଟି ପ୍ରିତି ପ୍ରତି ଏହା ଏକ ଉପହାସ ନୁହେଁ କି ?
ତେଣୁ ଏହାର ସୁବିଚାର କରାଯାଇ ଏଥିରେ ପୁର୍ଣ୍ଣ ଚ୍ଛେଦ ପକାଇବା ସହ ସସମ୍ମାନେ ଯୁଗଜନ୍ମା ଙ୍କୁ ତାଙ୍କ ମାନ ସମ୍ମାନ ଫେରାଇ ଆଣିବାରେ ସମସ୍ତ ଙ୍କ ସହଯୋଗ କାମନା କରିବା ପାଇଁ ଅଞ୍ଚଳବାସି ତଥା ଜେମା ସାମନ୍ତ ପ୍ରେମୀ ଦାବି ଜଣାଇଛନ୍ତି।
