ରାମମନ୍ଦିରରେ ସୁନାର ରାମଚରିତମାନସ ସ୍ଥାପିତ, ପୂର୍ବତନ ଆଇଏଏସ୍ ଦେଇଛନ୍ତି ଭେଟ
ଅଯୋଧ୍ୟାର ପ୍ରସିଦ୍ଧ ଶ୍ରୀରାମମନ୍ଦିରରେ ଏବେ ଭକ୍ତମାନେ ପ୍ରଭୁ ରାମଲଲାଙ୍କ ସହିତ ସୁନାର ରାମଚରିତମାନସର ବି ଦର୍ଶନ କରିବେ
ONM_News
ଅଯୋଧ୍ୟାର ପ୍ରସିଦ୍ଧ ଶ୍ରୀରାମମନ୍ଦିରରେ ଏବେ ଭକ୍ତମାନେ ପ୍ରଭୁ ରାମଲଲାଙ୍କ ସହିତ ସୁନାର ରାମଚରିତମାନସର ବି ଦର୍ଶନ କରିବେ । ନବରାତ୍ରିର ପ୍ରଥମ ଦିନ ଗର୍ଭଗୃହରେ ଏହାକୁ ବିଧି ବିଧାନର ସହ ସ୍ଥାପିତ କରାଯାଇଛି । ରାମଚରିତମାନସକୁ ରାମଲଲାଙ୍କ ମୂର୍ତ୍ତିଠାରୁ ୧୫ ଫୁଟ ଦୂରତାରେ ଏକ ପଥର ଆସନରେ ରଖାଯାଇଛି ।
୧୦୦୦ ପୃଷ୍ଠାବିଶିଷ୍ଟ ଏହି ରାମଚରିତମାନସର ଓଜନ ୧୫୫ କିଲୋଗ୍ରାମ । ଏଥିରେ ୪ କିଲୋ ସୁନା ଓ ୧୫୧ କିଲୋଗ୍ରାମ ତମ୍ବା ବ୍ୟବହାର କରାଯାଇଛି । ପ୍ରତି ପୃଷ୍ଠାରେ ୨୪ କ୍ୟାରେଟ୍ ସୁନାର ପରସ୍ତ ଚଢ଼ାଯାଇଛି । ସେହିପରି ପ୍ରତି ପୃଷ୍ଠାରେ ତମ୍ବା ବି ଲାଗିଛି । ଚେନ୍ନାଈର ପ୍ରସିଦ୍ଧ ଭୂମ୍ମିଦି ବଙ୍ଗାରୁ ଜୁଏଲର୍ସ ଏହାକୁ ୩ ମାସରେ ପ୍ରସ୍ତୁତ କରିଛି । ଏଥିଲାଗି ଖର୍ଚ୍ଚ ହୋଇଛି ପ୍ରାୟ ୫ କୋଟି ଟଙ୍କା । ଏ ସଂପର୍କରେ ରାମଚରିତମାନସ ଉପହାର ଦେଇଥିବା ଆଇଏଏସ୍ ଏସ୍. ଲକ୍ଷ୍ମୀନାରାୟଣ କହିଛନ୍ତି, ଆମେ ରୁଟି-ଡାଲି ଖାଉଥିବା ଲୋକ । ପେନସନ୍ ଟଙ୍କା ଖର୍ଚ୍ଚ ହେଉନାହିଁ । ଈଶ୍ୱର ଯାହା ଦେଇଛନ୍ତି ତାହା ତାଙ୍କୁ ହିଁ ଫେରାଇ ଦେଇଛି । ପ୍ରଭୁଙ୍କ ଚରଣରେ ତାଙ୍କର ପୁସ୍ତକ ଅର୍ପଣ କରି ମୋ’ ଜୀବନ ସଫଳ ହୋଇଯାଇଛି ।
