ୱାୟନାଡରେ ୫ ବର୍ଷ ପୂର୍ବେ ଘଟିଥିଲା ଭୂସ୍ଖଳନ
କେରଳର ୱାୟନାଡ଼ସ୍ଥିତ ୪ଟି ଗ୍ରାମ ଯଥା ମୁଣ୍ଡାକାଇ, ଚୁରଲମାଲା, ଅଟ୍ଟାମାଲା ଏବଂ ନୁଲପୁଝାରେ ସୋମବାର ରାତିରେ ଭୂସ୍ଖଳନ ଘଟି ଶତାଧିକ ଲୋକଙ୍କ ମୃତ୍ୟୁ ଘଟିଛି
ONM_News
କେରଳର ୱାୟନାଡ଼ସ୍ଥିତ ୪ଟି ଗ୍ରାମ ଯଥା ମୁଣ୍ଡାକାଇ, ଚୁରଲମାଲା, ଅଟ୍ଟାମାଲା ଏବଂ ନୁଲପୁଝାରେ ସୋମବାର ରାତିରେ ଭୂସ୍ଖଳନ ଘଟି ଶତାଧିକ ଲୋକଙ୍କ ମୃତ୍ୟୁ ଘଟିଛି । ୫ ବର୍ଷ ପୂର୍ବେ ଅର୍ଥାତ ୨୦୧୯ରେ ମଧ୍ୟ ପ୍ରବଳ ବର୍ଷା ଯୋଗୁ ଏହି ଗ୍ରାମଗୁଡ଼ିକରେ ଭୂସ୍ଖଳନ ହୋଇଥିଲା । ଏହାଯୋଗୁ ୧୭ ଜଣ ପ୍ରାଣ ହରାଇଥିଲେ ।
ବିଶେଷଜ୍ଞଙ୍କ କହିବା ଅନୁସାରେ, ୱାୟନାଡ଼ କେରଳର ଉତ୍ତରପୂର୍ବରେ ରହିଛି । ଏହା ରାଜ୍ୟର ଏକମାତ୍ର ପଥୁରିଆ ଅଞ୍ଚଳ । ଅର୍ଥାତ୍ ମାଟି, ପଥର ଏବଂ ତାହା ଉପରେ ବୃକ୍ଷଲତା ରହିଛି । ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆର ୨୦୨୧ ରିପୋର୍ଟ ମୁତାବକ କେରଳର ୪୩% ଅଞ୍ଚଳ ଭୂସ୍ଖଳନ ପ୍ରଭାବିତ । ୱାୟନାଡ଼ର ୫୧% ଜମି ପାହାଡ଼ରେ ରହିଛି । ଏହାର ଅର୍ଥ ଭୂସ୍ଖଳନ ହେବା ଆଶଙ୍କା ଅଧିକ । ଏଠାରେ ମୌସୁମୀ ଋତୁରେ ପ୍ରବଳ ବର୍ଷା ହୋଇଥାଏ । ୱାୟନାଡ଼ରେ କାବିନୀ ନଦୀ ବି ରହିଛି । ଏହାର ଶାଖା ନଦୀ ମନନ୍ତାୱଡ଼ି ‘ଥୋଣ୍ଡାରମୁଡ଼ି’ ପାହାଡ଼ରୁ ବାହାରିଛି । ଭୂସ୍ଖଳନ ଯୋଗୁ ଏହି ନଦୀରେ ବନ୍ୟା ଆସିଥାଏ । ଏହାଯୋଗୁ ବିଶେଷ କ୍ଷୟକ୍ଷତି ହୋଇଥାଏ ।
ଖସିଲା ବଡ଼ ବଡ଼ ପଥର
କେରଳର ୱାୟନାଡ଼ରେ ଭୂସ୍ଖଳନ ଯୋଗୁ ପାହାଡ଼ରୁ ବଡ଼ ବଡ଼ ପଥର ଖଣ୍ଡ ଖସିଥିଲା । ଜଳସ୍ରୋତ ଏତେ ପ୍ରଖର ଥିଲା ଯେ ପଥରଗୁଡ଼ିକ ଭାସିଆସି ଜନବସତି ଉପରେ ମାଡ଼ିଯାଇଥିଲା । ଏହାଯୋଗୁ ଅଧିକ କ୍ଷୟକ୍ଷତି ହୋଇଥିବା କୁହାଯାଉଛି । ବିଭୀଷିକା ପରେ ପ୍ରଭାବିତ ଗ୍ରାମଗୁଡ଼ିକର ସ୍ଥିତି ନଦୀ ଭଳି ହୋଇଯାଇଛି । ଏଠାରେ କେବେ ଗ୍ରାମ ଥିଲା ବୋଲି ଜଣାପଡ଼ୁ ନାହିଁ । ଚାରିଆଡ଼େ ମାଟି ଅତଡ଼ା ଓ ପଥରମାନ ପଡ଼ିଥିବା ବେଳେ ମଝିରେ ଜଳ ପ୍ରବାହିତ ହେଉଥିବା ଦେଖିବାକୁ ମିଳିଛି । ଭୂସ୍ଖଳନ ପରେ ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ କଣ୍ଟ୍ରୋଲ ରୁମ୍ ସ୍ଥାପନ ସହିତ ଜରୁରି ସ୍ୱାସ୍ଥ୍ୟ ସେବା ଲାଗି ହେଲ୍ପଲାଇନ ଜାରି କରାଯାଇଛି । ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ବୀଣା ଜର୍ଜଙ୍କ କହିବା ମୁତାବକ, ମୃତାହତ ସଂଖ୍ୟା ବଢ଼ିବା ଆଶଙ୍କା ଥିବାରୁ ବୈଥିରି, କଲପଟ୍ଟା, ମେପ୍ପାଡ଼ି ଏବଂ ମନନ୍ତାୱଡ଼ିରେ ଥିବା ହସ୍ପିଟାଲକୁ ପ୍ରସ୍ତୁତ କରାଯାଇଛି । କୋଝିକୋଡ଼ ଜିଲ୍ଲାରେ ଥିବା ପର୍ଯ୍ୟଟନ ସ୍ଥଳକୁ ନ ଯିବା ପାଇଁ ପର୍ଯ୍ୟଟକଙ୍କୁ ସତର୍କ କରାଯାଇଛି । ଏହାବ୍ୟତୀତ ସମସ୍ତ ଗ୍ରାନାଇଟ ଖାଦାନକୁ ଅସ୍ଥାୟୀ ଭାବେ ବନ୍ଦ କରାଯାଇଛି ।
ଭୂସ୍ଖଳନ ପୂର୍ବାନୁମାନ ବ୍ୟବସ୍ଥା ଲୋଡ଼ା
ୱାୟନାଡ଼ରେ ଭୂସ୍ଖଳନ ଘଟଣାକୁ ନେଇ ବୈଜ୍ଞାନିକ ଓ ବିଶେଷଜ୍ଞମାନେ ଏକ ଭୂସ୍ଖଳନ ପୂର୍ବାନୁମାନ ବ୍ୟବସ୍ଥା ନିମନ୍ତେ ଅପିଲ୍ କରିଛନ୍ତି । ସେମାନଙ୍କ କହିବାନୁସାରେ, ଭବିଷ୍ୟତର ସମ୍ଭାବ୍ୟ ଭୂସ୍ଖଳନ ଦ୍ୱାରା ପ୍ରଭାବିତ ହେବାକୁ ଥିବା ଲୋକଙ୍କ ସୁରକ୍ଷା ନିମନ୍ତେ ଏକ ଢାଞ୍ଚା ନିର୍ମାଣ ହେବା ଉଚିତ । ପୂର୍ବତନ ଭୂ-ବିଜ୍ଞାନ କେନ୍ଦ୍ରମନ୍ତ୍ରୀ ମାଧବନ ରାଜୀବନ କହିଛନ୍ତି, ପାଣିପାଗ ଏଜେନ୍ସିଗୁଡ଼ିକ ସାଙ୍ଘାତିକ ତଥା ଭାରୀ ବର୍ଷା ନେଇ ଆଗୁଆ ଆକଳନ କରିବା ଆବଶ୍ୟକ । କିନ୍ତୁ ଭୂସ୍ଖଳନ ନେଇ କେହି କିଛି କରିପାରୁ ନାହାନ୍ତି । ତେଣୁ ଏହାକୁ କିଭଳି ପୂର୍ବରୁ ଠଉରାଇ ହେବ, ତାହାର ସାଧନ ବାହାରିବା ଦରକାର । ତା’ଛଡ଼ା ପ୍ରବଳ ବର୍ଷା ଯେ ପ୍ରତିଥର ଭୂସ୍ଖଳନ ପାଇଁ ଦାୟୀ, ତାହା କୁହାଯାଇ ପାରିବ ନାହିଁ । ଆମକୁ ଏକ ପୃଥକ୍ ବ୍ୟବସ୍ଥା ଲୋଡ଼ା, ଯାହା ସ୍ୱତନ୍ତ୍ର ଭାବେ ଭୂସ୍ଖଳନର ପୂର୍ବାନୁମାନ ଲଗାଇ ପାରିବ । ଏଥିପାଇଁ ନିୟମିତ ବ୍ୟବଧାନରେ ମାଟିର ଗୁଣବତ୍ତା ଯାଞ୍ଚ କରାଯିବା ଉଚିତ । ସେ କହିଛନ୍ତି, ଯେତେବେଳେ ନଦୀର ଜଳସ୍ତର ଫୁଲେ, ଆମେ ତଟବର୍ତ୍ତୀ ଅଞ୍ଚଳରେ ଥିବା ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ନେଇଥାଉ । ଭୂସ୍ଖଳନ କ୍ଷେତ୍ରରେ ମଧ୍ୟ ସମାନ ପଦକ୍ଷେପ ନିଆଯାଇ ପାରିବ । ଆମ ପାଖରେ ଉନ୍ନତ ବିଜ୍ଞାନ ଓ ଦକ୍ଷତା ରହିଛି । ତେଣୁ ଆମେ ତାହାକୁ କାର୍ଯ୍ୟରେ ଲଗାଇ ପାରିବା । ବିପର୍ଯ୍ୟୟ ପରିଚାଳନା ବିଶେଷଜ୍ଞ ଶ୍ରୀକୁମାର କହିଛନ୍ତି, ୨-୩ ଦିନ ଧରି ୧୨୦ ମିଲିମିଟରରୁ ଅଧିକ ବର୍ଷା ହେବା ଅର୍ଥ ନିଶ୍ଚିତ ଭୂସ୍ଖଳନକୁ ନିମନ୍ତ୍ରଣ କରିବା । ପୂର୍ବରୁ ମଧ୍ୟ ଏଭଳି ଘଟିସାରିଛି । ତେଣୁ ଏଥର ପ୍ରବଳ ବର୍ଷା ହେବା ପରେ ଯଦି ସ୍ଥାନୀୟ ପ୍ରଶାସନ ସତର୍କତା ଅବଲମ୍ବନ କରିଥାନ୍ତା, ତେବେ ବଡ଼ ଅଘଟଣକୁ ଏଡ଼ାଯାଇ ପାରିଥାନ୍ତା । ଏଭଳି ଅଞ୍ଚଳରେ ପ୍ରଶାସନ ପକ୍ଷରୁ ଭୂସ୍ଖଳନ ବା ମୌସୁମୀ ନିରୋଧୀ ବାସଗୃହ ନିର୍ମାଣ ଲାଗି ପଦକ୍ଷେପ ନେବା ଆବଶ୍ୟକ ।
ଅଧିକ ସହାୟତା ଲୋଡ଼ିଲେ ମୁଖ୍ୟମନ୍ତ୍ରୀ
କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନ ଭୂସ୍ଖଳନ ପ୍ରଭାବିତ ଅଞ୍ଚଳର ପୁନର୍ନିମାଣ ଲାଗି ଅଧିକ ସହାୟତା ଲୋଡ଼ିଛନ୍ତି । ସେ କହିଛନ୍ତି, ଭୂସ୍ଖଳନ ପ୍ରପୀଡ଼ିତ ଲୋକଙ୍କ ପାଖରେ ଖାଦ୍ୟ ଓ ଜରୁରି ସାମଗ୍ରୀ ପଠାଇବା ଲାଗି ତ୍ୱରିତ ପଦକ୍ଷେପ ନିଆଯାଉଛି । ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ୨୦ ହଜାର ଲିଟର ପାନୀୟ ଜଳ ଥିବା ଦୁଇଟି ଗାଡ଼ି ପଠାଯାଇଛି । ପ୍ରାକୃତିକ ଦୁର୍ବିପାକ ଯୋଗୁ ଯାହା କ୍ଷତି ହୋଇଛି, ତାହାର ଭରଣା କରିବା କଷ୍ଟକର ବ୍ୟାପାର । ତେଣୁ ସେମାନଙ୍କୁ ଅଧିକ ସହାୟତା ଲାଗି ଆମ ସମସ୍ତଙ୍କୁ ଏକାଠି ହେବାକୁ ପଡ଼ିବ । ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀଙ୍କ ବିପର୍ଯ୍ୟୟ ରିଲିଫ ପାଣ୍ଠି (ସିଏମ୍ଡିଆର୍ଏଫ୍)କୁ ଦାନ କରିବା ପାଇଁ ମୁଁ ପ୍ରତ୍ୟେକଙ୍କୁ ଅପିଲ୍ କରୁଛି ।
