୨୦୪୦ରେ ଚନ୍ଦ୍ରରେ ଓହ୍ଲାଇବେ ଭାରତୀୟ, ଜୋରଦାର ପ୍ରସ୍ତୁତି ଚଳାଇଛି ଇସ୍ରୋ
୨୦୪୦ ମସିହାରେ ଚନ୍ଦ୍ରପୃଷ୍ଠରେ ପାଦ ରଖିବେ ଭାରତୀୟ
ONM_News
୨୦୪୦ ମସିହାରେ ଚନ୍ଦ୍ରପୃଷ୍ଠରେ ପାଦ ରଖିବେ ଭାରତୀୟ । ଏଥିପାଇଁ ଭାରତ ଜୋରଦାର ପ୍ରସ୍ତୁତି ଚଳାଇଛି । ଇସ୍ରୋ (ଭାରତୀୟ ମହାକାଶ ଅନୁସନ୍ଧାନ ସଂଗଠନ)ର ଅଧ୍ୟକ୍ଷ ଏସ୍ ସୋମନାଥ ଚନ୍ଦ୍ରଯାନ-୪ ମିଶନକୁ ନେଇ ଏହି ଗୁରୁତ୍ୱପୂର୍ଣ୍ଣ ତଥ୍ୟ ଦେଇଛନ୍ତି । ପଞ୍ଜାବରେ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସେ କହିଛନ୍ତି, ଚନ୍ଦ୍ରଯାନ-୪ ଏଭଳି ଏକ ଅବଧାରଣା, ଯାହା ଚନ୍ଦ୍ରଯାନ ସିରିଜ୍ର ପରବର୍ତ୍ତୀ ପର୍ଯ୍ୟାୟ ରୂପେ ବିକଶିତ ହେଉଛି ।
ସୋମନାଥ କହିଛନ୍ତି, ୨୦୪୦ ମସିହାରେ ଚନ୍ଦ୍ରପୃଷ୍ଠରେ ଜଣେ ଭାରତୀୟ ଅବତରଣ କରିବେ ବୋଲି ପ୍ରଧାନମନ୍ତ୍ରୀ ମୋଦି ଘୋଷଣା କରିଥିଲେ । ଏ କ୍ଷେତ୍ରରେ ଇସ୍ରୋ ନିରନ୍ତର ପ୍ରୟାସ ଜାରି ରଖିଛି । ଯଦି ଏପରି ହୁଏ, ଆମକୁ ଲଗାତାର ଚନ୍ଦ୍ରର ଅନୁସନ୍ଧାନ କରିବାକୁ ହେବ । ଚନ୍ଦ୍ରଯାନ-୪ ଏ ଦିଗରେ ନିଆଯାଇଥିବା ପ୍ରଥମ ପଦକ୍ଷେପ । ଏହି ମିଶନ ଅନ୍ତର୍ଗତ ଚନ୍ଦ୍ରଯାନ-୪ ଚନ୍ଦ୍ରକୁ ଯାଇ ନମୁନା ସଂଗ୍ରହ କରିବ ଏବଂ ସେଗୁଡ଼ିକୁ ପୃଥିବୀକୁ ଆଣିବ । ଏହା ମହାକାଶଯାତ୍ରୀଙ୍କ ପାଇଁ ଚନ୍ଦ୍ରପୃଷ୍ଠରେ ଅବତରଣର ମାର୍ଗ ପ୍ରଶସ୍ତ କରିବ ।
ଚନ୍ଦ୍ରଯାନ-୨ ଭଳି ଚନ୍ଦ୍ରଯାନ-୩ରେ ଲ୍ୟାଣ୍ଡର ଓ ରୋଭରକୁ ଚନ୍ଦ୍ରକୁ ପଠାଯାଇଥିଲା । ୨୦୨୩, ଜୁଲାଇ ୧୪ ତାରିଖରେ ଇସ୍ରୋ ଚନ୍ଦ୍ରଯାନ-୩ ଉତ୍କ୍ଷେପଣ କରିଥିଲା । ଅଗଷ୍ଟ ୨୩ ତାରିଖ ସନ୍ଧ୍ୟାରେ ଚନ୍ଦ୍ରଯାନ-୩ ଚନ୍ଦ୍ରର ଦକ୍ଷିଣ ମେରୁରେ ସୂକ୍ଷ୍ମାବତରଣ କରିଥିଲା । ଏଥିସହିତ ଚନ୍ଦ୍ରର ଦକ୍ଷିଣ ମେରୁକୁ ଲ୍ୟାଣ୍ଡର ପଠାଇଥିବା ଭାରତ ପ୍ରଥମ ଦେଶର ଗୌରବ ଲାଭ କଲା । ଚନ୍ଦ୍ରର ଦକ୍ଷିଣ ମେରୁ କ୍ଷେତ୍ରରେ ସୂକ୍ଷ୍ମାବତରଣ କରିବା ଚନ୍ଦ୍ରଯାନ-୩ ମିଶନର ପ୍ରଥମ ଉଦ୍ଦେଶ୍ୟ ଥିଲା । ବିକ୍ରମ ଲ୍ୟାଣ୍ଡର ଓ ପ୍ରଜ୍ଞାନ ରୋଭରରେ ସଂଲଗ୍ନ ଉପକରଣ ଜରିଆରେ ଚନ୍ଦ୍ର ପୃଷ୍ଠର ଅଧ୍ୟୟନ ଏଥିରେ ସାମିଲ ଥିଲା । ୨୦୨୩, ଅଗଷ୍ଟ ୧୭ ତାରିଖରେ ଯେଉଁ ପ୍ରପଲସନ୍ ମଡ୍ୟୁଲ ବିକ୍ରମ ଲ୍ୟାଣ୍ଡର୍ରୁ ଅଲଗା ହୋଇଥିଲା, ତା’ର ଜୀବନକାଳ ୩-୪ ମାସ ବୋଲି ପ୍ରଥମେ କୁହାଯାଉଥିଲା । କିନ୍ତୁ ଇସ୍ରୋ ଅନୁସାରେ, ଏହା ଅନେକ ବର୍ଷ ପର୍ଯ୍ୟନ୍ତ କାମ କରିପାରେ ।
୨୦୦୮ ମସିହାରେ ଇସ୍ରୋ ନିଜର ପ୍ରଥମ ଚନ୍ଦ୍ର ମିଶନ ଚନ୍ଦ୍ରଯାନ-୧ ଉତ୍କ୍ଷେପଣ କରିଥିଲା । ଏଥିରେ କେବଳ ଅର୍ବିଟର ଥିଲା । ତାହା ୩୧୨ ଦିନ ପର୍ଯ୍ୟନ୍ତ ଚନ୍ଦ୍ରକୁ ପରିକ୍ରମା କରିଥିଲା । ଚନ୍ଦ୍ରଯାନ-୧ ବିଶ୍ୱର ପ୍ରଥମ ଚନ୍ଦ୍ର ମିଶନ ଥିଲା, ଯାହା ଯାହା ଚନ୍ଦ୍ରରେ ଜଳର ଉପସ୍ଥିତିର ପ୍ରମାଣ ଦେଇଥିଲା । ୨୦୧୯ରେ ଲଞ୍ଚ୍ କରିଥିଲା ଚନ୍ଦ୍ରଯାନ-୨ । ଏଥିରେ ଅର୍ବିଟର ସମେତ ଲ୍ୟାଣ୍ଡର ଓ ରୋଭରକୁ ପଠାଯାଇଥିଲା । କିନ୍ତୁ ଏହି ମିଶନ ସମ୍ପୂର୍ଣ୍ଣ ରୂପେ ସଫଳ କି ବିଫଳ ହୋଇନଥିଲା । ଚନ୍ଦ୍ର ପୃଷ୍ଠରେ ଅବତରଣ ପୂର୍ବରୁ ବିକ୍ରମ ଲ୍ୟାଣ୍ଡର ଧକ୍କା ହେବାରୁ କ୍ରାଶ୍ ଲ୍ୟାଣ୍ଡିଂ ହୋଇଥିଲା । କିନ୍ତୁ ଅର୍ବିଟର ତା’ର କାମ କରୁଥିଲା ।
